Tujetsch sesanfla sisum la Surselva. Il Pass Alpsu colligia la Val Tujetsch culla Val d’Ursera. Sin nies territori sesanfla la Tgina dil Rein: il Lag da Tuma.

Onns alla liunga ha nies pievel muntagnard viviu dall’agricultura. Ina gronda midada ha la construcziun dils lags da fermada e l’explotaziun dalla forza dall’aua ils onns sissonta purtau. Ils tscheins d’aua han possibilitau da migliurar l’infrastructura e d’introducir il turissem d’unviern. Gl’unviern carmala in vast intschess d’ir cun skis ils hosps da lunsch e damaneivel. La stad existan numerusas pusseivladads per excursiuns da viagiar ni per turas cul velo da muntogna pli levas ni era pli pretensiusas. Era il Lag Claus a Surrein ch’ei vegnius construius igl onn 2011 envida tuts tier ina frestgentada ni per sesluccar. La bellezia cuntrada ei nies scazi.

La vischnaunca da Tujetsch sesviluppescha vinavon a moda dinamica ed investescha intenziunadamein en siu avegnir. Cun ils dus projects solars alpins Sedrun Solar e NalpSolar neschan indrezs impurtonts per la producziun d'energia persistenta che rinforzescha Tujetsch sco vischnaunca d'energia da muntada naziunala. Sedrun Solar vala sco emprem implont alpin grond da fotovoltaic en Svizra. NalpSolar al Lai da Nalps sco era Sedrun Solar vegnan a prestar in'impurtonta contribuziun per la producziun d'electricitad d'unviern. Era la qualitad da viver per indigens e hosps vegn migliurada: La sanaziun dil bogn cuvretg Bogn Sedrun procura per ina purschida moderna dil temps liber e da recreaziun, ferton che la Golden Card porscha avantatgs attractivs per la populaziun. Plinavon spetgan projects plein tensiun: In niev parc da freestyle duei slargar la purschida da sport e temps liber existenta e culla nova plazza da giugs Drun dat ei el center dil vitg in attractiv liug da sentupada per famiglias ed affons. Cun quellas investiziuns vul Tujetsch contonscher persistenza, qualitad da viver ed in ferm avegnir per l'entira regiun.