Tujetsch fuorma la finiziun el nord dil cantun Grischun viers ils cantuns Uri e Tessin e cunfinescha egl ost cun las vischnauncas da Mustér e Medel. Sia grondezia munta a 134 km². Quei ei in grond territori, sch’ins cumpareglia Tujetsch p. ex. cul cantun Appenzell (IR) cun ina grondezia da 173 km². 45% da sia surfatscha ei denton buca fritgeivla. Sedrun schai sin 1’441 m s. m. Il pli ault punct ei il Péz Tgietschen cun 3’328 m s. m. ed il pli bass ei il letg dil Rein sut Nislas cun 1’230 m s.m. Tujetsch ei ina dallas pli ault situadas regiuns dalla Surselva. Quei ha consequenzas silla vegetaziun: Ei dat strusch pumera ed il graun vegn buca diltut madirs, aschia ch’el stueva vegnir deponius pli baul per entgin temps sin chischners per saver madirar cura ch’el vegneva aunc cultivaus en Tujetsch.

Plirs pass colligian Tujetsch cun autras regiuns: Il Pass Las Cruschs: Sedrun – Amsteg; il Pass Bornengo: il Pass Alpsu – Lucmagn ni Airolo; il Pass Tagliola: Pass Alpsu – Val d’Ursera; il Pass da Maighels: il Pass Alpsu – Val d’Ursera. Da gronda impurtonza ei il Pass Alpsu che colligia Tujetsch cun Ursera entras in stradun ed ina viafier.